Ushtria izraelite njoftoi të mërkurën se ka nisur operacione të reja tokësore në Rripin e Gazës, duke rimarrë pjesërisht një zonë kyçe, një ditë pas bombardimeve ajrore që prishën marrëveshjen e armëpushimit dy-mujor me Hamasin.
Izraeli akuzoi Hamasin për refuzimin e lirimit të pengjeve dhe për bllokimin e bisedimeve me ndërmjetësuesit, ndërsa Hamasi e fajësoi kryeministrin Benjamin Netanyahu për prishjen e armëpushimit.
Trupat izraelite zgjeruan kontrollin mbi Korridorin Netzarim, një zonë strategjike që ndan Gazën veriore nga jugu. Ky korridor ishte lënë i lirë gjatë armëpushimit të janarit, duke u përdorur nga qindra mijëra palestinezë për t’u zhvendosur në pjesë të ndryshme të enklavës.
Të martën, bombardimet izraelite vranë mbi 400 palestinezë, sipas Ministrisë së Shëndetësisë në Gaza. OKB konfirmoi vdekjen e një punonjësi të saj nga një shpërthim në selinë e saj në Gaza qendrore, ndërsa pesë të tjerë u plagosën.
Ndërkohë, mijëra izraelitë protestuan në parlamentin izraelit kundër politikave të Netanyahut, duke e akuzuar për përdorimin e luftës për të mbajtur pushtetin.
Ministri i Mbrojtjes i Izraelit, Israel Katz, paralajmëroi se banorët e Gazës “do të paguajnë çmimin e plotë” nëse pengjet nuk lirohen.
Izraeli ka shpëtuar vetëm tetë pengje të gjalla nga 251 të rrëmbyer nga Hamasi më 7 tetor 2023, ndërsa shumica janë liruar përmes marrëveshjeve të shkëmbimit me të burgosur palestinezë.
