Në Stamboll kanë shpërthyer protestat dhe incidente pas arrestimit të kryebashkiakut të Stambollit, Ekrem Imamoglu.
Edhe pse qeveria kishte miratuar një ligj që ndalonte tubimet, studentët e universitetit u mblodhën për të protestuar. Policia u përpoq të bllokonte marshimin, por mijëra protestues duke brohoritur pro-demokracisë, arritën të thyenin bllokadën e policisë.
Jashtë portave kryesore të universiteteve, studentët u bënë thirrje studentëve të tjerë që të mbrojnë të drejtat dhe liritë e tyre demokratike. Më pas marshimi u drejtua drejt bashkisë së qytetit në zonën e Saratchane. Situata mbetet e tensionuar, ndërsa studentët deklarojnë se do të vijojnë protestat e tyre.
Kryetari i bashkisë së Stambollit, Ekrem Imamoglu, është arrestuar në orët e para të mëngjesit të sotëm, pasi akuzohet për korrupsion dhe lidhje me organizata terroriste. Partia kryesore opozitare, Partia Republikane Popullore (CHP), ishte në prag ta shpallte Imamoglun kandidat për president për të sfiduar Erdogan, i cili ka udhëhequr Turqinë për më shumë se dy dekada.
