Ditën e hënë, vendi ynë do të ndikohet nga kushte atmosferike të paqëndrueshme, ku sipas parashikimeve, moti do të karakterizohet nga vranësira mesatare deri të dendura, të alternuara me intervale të shkurtra kthjellimesh.
Reshjet e shiut do të jenë të prezent dhe me intensitet të ulët në pjesën më të madhe të territorit, ndërkohë, përgjatë Ultësirës Perëndimore, reshjet do të jenë herë pas here me intensitet mesatar.
Në zonat malore, në lartësitë mbi 800-900 metra, priten reshje bore me intensitet të ulët, ndërsa në Alpe dhe në malet më të larta reshjet e borës do të jenë me intensitet mesatar.
Temperaturat e ajrit do të pësojnë sërish rënie të tyre duke u luhatur nga 2°C vlera minimale e shënuar në qytetin e Peshkopisë deri në 19°C vlera maksimale e cila pritet në qytetin e Vlorës.
Era do të fryjë e lehtë dhe mesatare, përgjatë gjithë ditës duke arritur shpejtësinë maksimale mbi 40 km/h nga drejtimi Veriperëndimor; për pasojë në brigjet detare do të krijohet dallgëzim 3 ballë.
