Selami Jenisheri, kryetari i Partisë së Bashkimit Popullor të Pensionistëve Shqiptarë, ka qenë i ftuar në emisionin “Review” për të folur mbi negociatat e partisë së tij me Partinë Demokratike (PD), duke sqaruar kur kanë nisur këto negociata, pra para apo pas regjistrimit të partisë së tij.
Jenisheri theksoi se nëse kërkesa e tij për të pasur një deputet në listat e mbyllura të PD-së në qarkun e Tiranës plotësohet, partia e tij mund t’i sigurojë koalicionit të PD-së rreth 25 mijë vota.
“Kjo parti mund të duket e vogël, por nuk është ashtu. Partia jonë ka një bazë prej 730 mijë pensionistësh. Jemi regjistruar për zgjedhjet parlamentare të 11 majit 2025 dhe e kemi konsideruar të arsyeshme të bashkohemi me koalicionin e PD-së. Fillimisht, na thirrën për një takim para firmosjes, ku morën pjesë 7 parti. Na intereson të jemi pjesë e këtij koalicioni. Në fillim, unë personalisht doja të isha në negociata me Dashamir Shehin, por më pas qëndruam me përfaqësuesit e PD-së. Kërkojmë që PD të përfshijë një deputet nga partia jonë në listat e mbyllura të Tiranës,” tha Jenisheri.
Ai shtoi se nëse kërkesa e tij plotësohet, PD mund të presë një rritje të konsiderueshme të mbështetjes. “Nëse kjo kërkesë realizohet, ne do t’i ofrojmë PD-së një forcë ekonomike dhe politike të dyfishuar, një drejtësi si në SHBA. Në Tiranë ka rreth 250 mijë pensionistë dhe 5 zyra ku ata marrin pensionet. Unë mund të shkoj në këto zyra dhe t’u shpjegoj pensionistëve se si do të rritet pensioni deri në 200 mijë lekë. Me këtë, mund t’i japim PD-së 25 mijë vota, të paktën 3 deputetë,” theksoi Jenisheri.
