Në emisionin “Open” në News 24, analisti Fatos Lubonja ka komentuar pezullimin e ndihmës për Ukrainën nga SHBA, duke e interpretuar këtë si një shenjë të humbjes së luftës nga Aleanca Veri-Atlantike.
Lubonja u shpreh se, megjithëse nuk është simpatizant i Donald Trump, ai mendon se ky veprim tregon një pranim indirekt të humbjes dhe është një kritikë ndaj administratës së Biden.
Lubonja theksoi se Donald Trump dëshiron të vendosë paqe dhe këtë qëndrim e sheh si një mundësi për të stabilizuar situatën globale. Analisti kujtoi gjithashtu se nuk është hera e parë që SHBA ka lënë një konflikt pas, duke përmendur përvojën e fundit të tërheqjes nga Afganistani. Lubonja tha gjithashtu që Trump i deklaroi qartë presidentit ukrainas, Zelensky, se Ukraina nuk ka mundësi të fitojë pa një mbështetje të fortë dhe ka kërkuar një marrëveshje paqeje.
Lubonja: Nuk jam simpatizant i Trump për shumë arsye. Por, kjo lëvizje duhet parë si pranim indirekt se lufta është humbur nga Aleanca Veri-Atlantike dhe për këtë Trump fajëson administratën Biden. Henry Kissinger ka thënë se Amerika nuk ka miq, por ka interesa. Ai ka thënë se të jesh mik i Amerikës, mund të jetë edhe fatale. Nuk është hera e parë që Amerika ka lënë një luftë pezull në rruzull.
E fundit që ka lënë ka qenë Afganistani. Disa gjëra që thotë Trump qëndrojnë. Trump i tha Zelenskyt që ti nuk ke karta. Trump do që të vendoset paqe dhe kjo është në interes të të gjithë botës. Europa përdor termin “paqe e drejtë”.Por, kjo është paqe, që e vendos ai që është më i forti.
