Përfundimi i studimeve dhe nisja e një karriere profesionale është një sfidë e madhe për shumë të rinj shqiptarë. Shumë prej tyre mendojnë se tregu i punës është i mbyllur dhe se pa lidhje shoqërore nuk mund të gjejnë punë.
Por a është kjo një realitet apo një perceptim që i ndalon ata të ndërmarrin hapat e parë?
Ekspertët që studiojnë tregun e punës e shohin problemin jo vetëm te mungesa e mundësive të punës, por edhe te mentaliteti i rinisë.
“Një nga vështirësitë kryesore është pritshmëria e lartë që kanë të rinjtë sapo përfundojnë studimet apo arsimin profesional. Gjithashtu, ka edhe një perceptim negativ rreth mundësive të punësimit në Shqipëri, që shpesh herë i pengon ata të aplikojnë, edhe pse ekzistojnë mundësi vakante. Vetëm përmes aplikimeve dhe, ndoshta, refuzimeve, ata do të përgatiten më mirë për tregun e punës,” thotë Arbër Xhihani, ekspert punësimi.
Por ka edhe të rinj që e shohin tregun e punës ndryshe. Kamila, një studente e drejtësisë që tashmë punon në profesionin e saj, beson se përkushtimi dhe meritokracia janë çelësi i suksesit.
“Unë punoj aktualisht në profesionin për të cilin kam studiuar dhe nuk e kam gjetur aspak të vështirë, edhe pse ka statistika që tregojnë se studentët e drejtësisë hasin vështirësi për shkak të numrit të madh. Çelësi është të spikasësh. Ka një stereotip që është e pamundur të gjesh punë nëse nuk ke lidhje ose nëse nuk përdor mekanizma si nepotizmi. Në realitet, unë mendoj se jam një shembull që ka arritur përmes meritokracisë,” shprehet ajo.
Ekspertët thonë se mundësitë janë aty, por duhet të shfrytëzohen.
