Kryeministri i Mbretërisë së Bashkuar Keir Starmer ka mbërritur sot në Shtëpinë e Bardhë për bisedime me Donald Trump mbi çështjen e Ukrainës dhe mbrojtjen.
Pas shtrëngimit të duarve, dy liderët kanë hyrë në Shtëpinë e Bardhë për të zhvilluar një bisedë në Zyrën Ovale.
Një zyrtar amerikan tha se Trump është “shumë i kënaqur” me njoftimin që Starmer bërë këtë javë se Mbretëria e Bashkuar do të rrisë shpenzimet e mbrojtjes në 2.5% të PBB-së deri në vitin 2027, nga 2.3%
Kryeministri Starmer u tha gazetarëve të martën se rritja e shpenzimeve të mbrojtjes është një proces që ka filluar para tre vjetësh, pas fillimit të agresionit rus kundër Ukrainës më 2022. Rritja e shpenzimeve do të financohet duke ulur buxhetin e ndihmës për botën e jashtme. Kjo ndihmë tani do të jetë vetëm 0.3% e PBB-së.
Ai e pranoi se vendimi për të rritur shpenzimet e mbrojtjes ishte “përshpejtuar” ndërsa Presidenti Trump ka filluar takimet me Moskën, pa përfshirjen e Ukrainës, apo evropianëve dhe e ka bërë të qartë se po zvogëlon mbështetjen amerikane për sigurinë e Evropës.
“Presidenti Trump mendon se ne duhet të bëjmë më shumë dhe unë jam dakord me të. Këtë mendim kam edhe unë”, tha zoti Starmer. Ai shtoi se synon gjithashtu të rrisë më tej shpenzimet e mbrojtjes në 3% në një mandat të mundshëm të ardhshëm, i cili do të fillojë më 2029, pas zgjedhjeve të ardhshme.
Gjatë takimit me Presidentin Trump, Kryeministri Starmer do të bëj përpjekje të përforcojë qëndrimin se evropianët duhet të jenë pjesë e çdo diskutimi mbi luftën në Ukrainë, tha Gesine Weber nga Fondi gjerman Marshall.
Takimi i Starmer me Trump vjen pasi zyrtarët amerikanë dhe rusë zhvilluan bisedime në Turqi për paqen në Ukrainë.
Vladimir Putin tha se bisedimet “frymëzojnë shpresë” dhe se të dy vendet mund të gjejnë gjuhën e përbashkët – përfshirë luftën në Ukrainë
Ndërkohë, presidenti i Ukrainës Zelensky pritet të mbërrijë në Shtëpinë e Bardhë ditën e nesërme për të nënshkruar marrëveshje për mineralet.
