Kapaciteti financiar i familjeve shqiptare për të përballuar goditje apo shpenzime të papritura mbetet i kufizuar, duke nxjerrë në pah një brishtësi të ndjeshme në sigurinë ekonomike të amvisërive.
Sipas gjetjeve të raportit Securimeter 2026, 46% e të anketuarve në Shqipëri pohojnë se familjet e tyre nuk kanë mundësi të përballojnë një shpenzim të paparashikuar prej rreth 1000€ pa u detyruar të marrin borxh apo të kërkojnë ndihmë financiare nga të tjerët, çka do të thotë se pothuajse një në dy familje e ka të vështirë ta mbulojë një emergjencë të tillë me burimet e veta.
Nga ana tjetër, vetëm 35% e të anketuarve në vend deklarojnë se kanë kapacitetin e nevojshëm për ta përballuar këtë kosto me mjetet e tyre, ndërsa 19% shprehen të pasigurt nëse buxheti familjar do t’ua lejonte një gjë të tillë.
Krahasimi rajonal tregon se pamundësia për të mbuluar një shpenzim të tillë është më e lartë në Shqipëri sesa në vendet fqinje, pasi në Maqedoninë e Veriut këtë e pohojnë 41% e të anketuarve, në Kosovë 36%, në Serbi 31%, në Bosnjë dhe Hercegovinë 30% dhe në Mal të Zi 29%, megjithëse në raport me përgjigjet pozitive Shqipëria del e para në rajon me 35% për qind, e ndjekur nga Mali i Zi dhe Bosnja dhe Hercegovina me nga 34%.
Në shkallë të gjerë në Ballkanin Perëndimor, 36% e të anketuarve deklarojnë se nuk kanë mundësi të përballojnë një shpenzim të papritur prej 1000€, 31% nuk janë të sigurt dhe 33% thonë se kanë hapësirën e duhur financiare.
Të dhënat në tërësi dëshmojnë për një dobësi strukturore në qëndrueshmërinë ekonomike të familjeve në rajon, ku një kosto e vetme e paparashikuar rrezikon të cenojë ekuilibrin e shpenzimeve të përditshme dhe t’i shtyjë qytetarët drejt mbështetjes së jashtme ose borxhit.











