Detaje të reja janë zbuluar lidhur me plagosjen e ndodhur ditën e sotme në fshatin Bicaj të Kukësit, ku i plagpsur mbeti 29-vjeçari Elvis Halilaj, kushëriri i Kryetarit të Bashkisë Kukës, Albert Halilaj.
Autori i dyshuar i ngjarjes i cili ende është në kërkim, është Zenel Muçmata, Drejtor i Shërbimeve në Bashkinë e Kukësit. Sipas informacioneve, ngjarja ka nisur nga një konflikt i çastit për arsye të paqarta, ku Halilaj ka goditur Muçmatën me grusht. Pas kësaj, 29-vjeçari është larguar për në shtëpinë e tij, ndërkohë që Zenel Muçmata e ka ndjekur me automjet dhe ka qëlluar ndaj tij sapo ka arritur pranë banesës së Halilajt.
Plumbi ka goditur Halilajn në fundshpinë, por fatmirësisht nuk ka shkaktuar dëme në organet jetësore. Ai po merr trajtim mjekësor në spitalin e Kukësit dhe aktualisht ndodhet jashtë rrezikut për jetën.
Policia është angazhuar në kërkimin e autorit dhe po punon për zbardhjen e plotë të rrethanave të ngjarjes.
