Tërheqja e Cristiano Ronaldos nga Kombëtarja vazhdon të krijojë tension në Portugali, ndërsa këtë herë në qendër të debatit është nëna e tij, Dolores Aveiro.
Pas humbjes së rëndë 4-1 ndaj Danimarkës, në mbrëmjen kur Portugalia organizoi edhe homazhin për ish-kapitenin, Dolores reagoi ashpër ndaj situatës që çoi në largimin e djalit të saj.
“Ai ishte i trishtuar sepse e mashtruan. Edhe unë jam e trishtuar”, deklaroi ajo.
Nëna e Ronaldos kritikoi gjithashtu mënyrën se si u organizua homazhi, duke thënë se ceremonia e vërtetë duhej të zhvillohej në “José Alvalade”, stadiumin e Sportingut, klubit ku Cristiano nisi karrierën.
Ajo nuk kurseu as Kombëtaren pas humbjes ndaj Danimarkës:
“Ishte një humbje e merituar.”
Deklaratat iu përcollën Jorge Jesusit, i cili u përgjigj me ironi, por shmangu një përplasje të drejtpërdrejtë me familjen Ronaldo.
“Duhet t’i përgjigjem tani edhe nënës së Cristiano Ronaldos? Kam shumë respekt për të. Një nënë është një nënë dhe unë duhet ta respektoj.”
Trajneri i Portugalisë shtoi se e kupton reagimin e Dolores Aveiros dhe instinktin e saj për të mbrojtur djalin.
“Një nënë i mbron gjithmonë fëmijët e saj, deri në fund. Ajo ka vuajtur shumë për t’i rritur fëmijët dhe ka qenë një nënë shembullore.”
Jesus insistoi se deklaratat nuk ndikojnë te skuadra dhe se çështja po vazhdon të mbahet gjallë kryesisht nga pyetjet e mediave.
“Kjo nuk ndikon në asgjë. Nuk e di kur do të përfundojë kjo histori. Jeni ju që vazhdoni të bëni pyetje.”
Në fund, trajneri përsëriti respektin për Ronaldon, me të cilin kishte punuar më parë te Al Nassr.
“Cristiano është një legjendë e Portugalisë. E njoh shumë mirë. Por tani duhet të ecim përpara pa të.”











