Është caktuar gjyqtarja që do të shqyrtojë në seancë paraprake dosjen “Partizani”.
Mësohet se Flojera Davidhi është gjyqtarja e cila do të gjykojë nëse dosja Partizani do të dërgohet në gjyq apo jo.
Ditën e djeshme, pas një hetimi 4-vjeçar dy prokurorët e posaçëm Arben Kraja dhe Enkelejda Millonai dorëzuan dosjen “Partizani” në Gjykatën e Posaçme.
Dosja e përbërë nga 333 fashikuj hetimorë, u dorëzua mbrëmjen e djeshme.
Pesë të pandehurit, Sali Berisha, Jamarbër Malltezi, dy biznesmenët Fatmir Bektashi e Xhimi Begeja dhe noterja Andia Pustina tashmë do të përballen me akuzat që rëndojnë mbi ta.
Ish-kryeministri i vendit akuzohet për korrupsionit pasiv, pasi SPAK thotë se i hapi rrugën dhëndrit të tij për të përfituar nga prona e ish-kompleksit sportiv, që dikur i ka përkitur shtetit.
Dhëndri i tij është ai që ka pozitën më të rëndë përballë drejtësise pasi, krahas korrupsionit akuzohet edhe për pastrim parash, ndërsa tre të tjerët akuzohen vetëm për pastrim parash.
