Një profil i sapohapur në Facebook ka sulmuar gazetaren Glidona Daci. Faqja e krijuar me identitetin e personit të sajuar, “Nesti Angoni” (i njëjti që bëri kallëzimin ndaj kryebashkiakut Erion Veliaj), ka nisur një fushatë sulmesh ndaj gazetares. Pavarësisht se identiteti i personit që ka hapur faqen mbetet i panjohur, disa orë pas publikimit të mesazheve, gazetarja Glidona Daci ka reaguar vetë.
Në një intervistë për BIRN, Daci, gazetare në Klan News, tha se sulmi ka lidhje me punën e saj dhe komentet e fundit që ka bërë për hetimet që po zhvillohen nga Prokuroria e Posaçme kundër Korrupsionit dhe Krimit të Organizuar. Ajo shprehu se nuk është hera e parë që është sulmuar për shkak të profesionit të saj, por shtoi se nuk e priste që sulmet të arritnin deri në këtë pikë, duke synuar denigrimin e saj. Ajo tha gjithashtu se do të depozitojë një kallëzim për këtë rast.
“Sulmi lidhet me detyrën time si gazetare, veçanërisht për raportimet që kam bërë lidhur me zhvillimet e fundit dhe punën e Prokurorisë së Posaçme. Nuk është hera e parë që jam në qendër të këtyre sulmeve, por që të arrijnë deri në këtë pikë për të më denigruar, nuk e prisja. Familjes time i them: mos u shqetësoni, ju e dini se çfarë vajze keni rritur dhe nuk do të dorëzohem në punën time,” tha Daci për BIRN.
Për këtë incident, reagoi edhe Asociacioni i Gazetarëve të Shqipërisë. Organizata shprehu shqetësimin e saj për rritjen e sulmeve online ndaj gazetarëve, veçanërisht ndaj grave, gjatë ditëve të fundit. Ajo theksoi se, në një klimë politike të tensionuar, shqetësueshëm po rritet përdorimi i gjuhës së urrejtjes, intimidimit dhe përpjekjeve për të denigruar gazetarët.
Roli i gazetarëve është të raportojnë për ngjarjet dhe drejtësinë, dhe askush nuk duhet t’i pengojë në ushtrimin e këtij detyra. Ata kërkuan që të gjitha palët e përfshira të tregojnë respekt dhe vetëpërmbajtje ndaj gazetarëve, të cilët kanë të drejtën dhe detyrën të informojnë publikun me saktësi dhe paanshmëri.
Pritet që hetimet nga Policia të zbulojnë autorët e sulmeve online që synojnë të dëmtojnë imazhin e gazetarëve dhe figurave publike.
