Kreu i demokratëve në Dhomën e Përfaqësuesve, Hakeem Jeffries, ka deklaruar se partia e tij do të sjellë një ndryshim të thellë në drejtimin e vendit, pas fitores historike në zgjedhjet e mesmandatit në SHBA. Në një konferencë për mediat, Jeffries tha se amerikanët kanë zgjedhur ndryshimin, duke i dhënë fund asaj që ai e cilësoi si një periudhë ekstremizmi, korrupsioni dhe kaosi nën administratën Trump.
Jeffries bëri të ditur se prioritetet e demokratëve do të jenë ulja e kostos së jetesës, përballueshmëria e banesave, shëndetësia dhe arsimi. Ai premtoi gjithashtu të punojë për rikthimin e fondeve të shkur të Medicaid-it, zgjatjen e lehtësive fiskale për sigurimet shëndetësore dhe përfundimin e luftës me Iranin. “Populli amerikan ka zgjedhur ekonominë mbi ekstremizmin, shpresën mbi urrejtjen dhe arsyen e shëndoshë mbi korrupsionin, kaosin dhe mizorinë”, deklaroi ai.
Demokratët kanë siguruar kontrollin e të dyja dhomave të Kongresit, Dhomës së Përfaqësuesve dhe Senatit, duke i dhënë fund shumicës republikane në Uashington. Jeffries pritet të marrë drejtimin e Dhomës së Përfaqësuesve në janar, kur të mblidhet Kongresi i ri, duke u bërë kështu kryetari i parë me ngjyrë në historinë e këtij institucioni.
