Kryetari i Partisë Demokratike, Sali Berisha, ka ashpërsuar akuzat ndaj kryeministrit Edi Rama, duke e krahasuar qeverisjen e tij me regjimin e Beogradit. Në një deklaratë për mediat, Berisha pretendon se Shqipëria ka zëvendësuar shtetin ligjor me atë që ai e cilëson si “narkoshtet”, ndërsa pushtetin e akuzon për veprime autoritare dhe presion ndaj fjalës së lirë.
Sipas kreut të PD-së, pavarësisht kontrollit që, sipas tij, Rama dhe njerëzit pranë tij ushtrojnë mbi institucionet, themelet e pushtetit janë tronditur nga protestat e qytetarëve dhe qëndresa e opozitës.
“Ka një regjim në shkërmoqje në Europë që po ndjek hap pas hapi regjimin e Beogradit, dhe ky është regjimi i Tiranës”, deklaroi Berisha.
Ai u ndal edhe te protestat e zhvilluara kundër qeverisë, të cilat i cilësoi si më të mëdhatë në historinë e vendit. Berisha pretendoi se dhjetëra e qindra mijëra shqiptarë, nga brenda dhe jashtë vendit, kanë mbushur rrugët dhe sheshet e Tiranës kundër qeverisë së Ramës.
Në qëndrimin e tij, kreu i demokratëve akuzoi gjithashtu kryeministrin për vjedhjen e pasurisë publike, varfërimin e qytetarëve dhe krijimin e kushteve që, sipas tij, po nxisin largimin e shqiptarëve nga vendi.
Berisha vlerësoi edhe mbështetjen e aleatëve ndërkombëtarë, duke pretenduar se qëndrimet e tyre dhe rezolutat e organizatave politike ndërkombëtare kanë dëmtuar imazhin e qeverisë shqiptare.
Në përfundim, ai dënoi atë që e cilësoi si qëndrime autoritare dhe mafioze ndaj debatit publik dhe lirisë së shprehjes, duke e lidhur këtë me përpjekjet për të mbrojtur kryeministrin nga kritikat.
