Gazetari Almer Toska ka bërë një deklaratë të fortë në një studio televizive, duke pohuar se ekzistojnë skenarë ndërkombëtarë që mund të çojnë në shtyrjen e zgjedhjeve të 11 majit në Shqipëri.
Sipas Toskës, veprimet e SPAK mund të vazhdojnë edhe ndaj figurave të rëndësishme të politikës, si Taulant Balla dhe Belinda Balluku, duke krijuar një krizë politike në vend. Ai parashikon se një situatë e tillë mund të çojë në formimin e një qeverie teknike ose me bazë të gjerë, e cila do të hapte rrugën për një klasë të re politike dhe një sistem më të drejtë e transparent.
Gazetari theksoi se, sipas tij, Edi Rama nuk do të jetë kryeministër pas zgjedhjeve të 11 majit, duke argumentuar se ndryshimet në Shqipëri do të ndodhin si rezultat i lëvizjeve politike ndërkombëtare, veçanërisht nga SHBA.
Toska beson se ky proces mund të sjellë një “erë të re” në politikën shqiptare, duke hapur rrugën për liderë që do të kontribuojnë në rivendosjen e besimit tek institucionet dhe drejtësia.
“Sot ka një skenar ndërkombëtar që synon një pastrim të plotë të politikës shqiptare, i cili mund të çojë edhe në shtyrjen e zgjedhjeve. Nëse përpara zgjedhjeve preken figura si Balluku dhe Balla, si dhe ndonjë përfaqësues nga krahu i djathtë, vendi mund të përballet me një krizë politike. Mendoj se Edi Rama nuk do të jetë kryeministër pas 11 majit. Për të rivendosur besimin, mund të formohet një qeveri me bazë të gjerë ose teknike, e cila do të sjellë në politikë njerëz të ndershëm. Kush e realizon këtë ndryshim, do të jetë ai që do të qeverisë vendin. Kjo është një erë e re që po fryn. Nëse ndodhin lëvizje në SHBA, ato ndihen edhe këtu”, deklaroi Toska.
