Aleksandër Vuçiç ka pranuar humbjen në zgjedhjet parlamentare të parakohshme në Serbi dhe deklaroi se Lista Studentore ka siguruar fitoren, sipas rezultateve paraprake të paraqitura prej tij.
Në një deklaratë pas zgjedhjeve, presidenti serb pranoi se kampioni i të dhënave në dispozicion tregon humbjen e forcës së tij politike përballë Listës Studentore, e cila ka dalë në garë në sfondin e protestave dhe pakënaqësisë ndaj qeverisjes.
“Ne nuk i kemi rezultatet përfundimtare. Shumëkush do të habitet dhe do ta kuptoni se sa shumë kanë gënjyer disa dhe çfarë kanë shpikur. Dua t’ju informoj se, bazuar në kampionin e shtresëzuar, është e qartë se ne i kemi humbur këto zgjedhje”, deklaroi Vuçiç.
Sipas shifrave të bëra publike prej tij, Lista Studentore pritet të sigurojë nga 135 deri në 140 mandate, ndërsa forca politike e Vuçiçit rreth 105 mandate. Ai pretendoi gjithashtu se asnjë subjekt tjetër nuk ka arritur të sigurojë përfaqësim parlamentar, me përjashtim të përfaqësuesve të pakicave të përmendura në deklaratën e tij.
“Ne kemi rreth 1 milion e 720 mijë vota, por kjo shifër nuk ka fare rëndësi në këtë moment. Ata kanë rreth 2 milionë e 200 mijë vota”, u shpreh presidenti serb.
Rezultatet e përmendura mbeten paraprake, pasi vetë Vuçiç theksoi se numërimi dhe përpunimi i të dhënave nuk kanë përfunduar. Konfirmimi përfundimtar i rezultatit pritet nga autoritetet zgjedhore të Serbisë.
