Pamje të rënda janë regjistruar gjatë protestës para Ministrisë së Arsimit, në ditën e katërt të saj. Në një moment tensioni në Rrugën e Durrësit, një efektiv policie shihet duke goditur dhe përplasur dhunshëm përtokë një të ri, i cili, sipas pamjeve, qëndronte i palëvizur në rrugë.
Goditja bën që i riu të rrëzohet me forcë në tokë, ndërsa pak çaste më vonë, disa efektivë të tjerë e rrethojnë dhe e tërheqin zvarrë. Një tjetër efektiv e qëllon në këmbë, ku duket se i shkakton dëmtime.
