Identifikimi i disa rasteve të fëmijëve me “miningit akut” në qytetin e Durrësit, ka futur në panik prindërit të cilët nuk po i dërgojnë më fëmijët në shkollë.
Veçanërisht në shkollat 9-vjeçare “Eftali Koçi” dhe “Kushtrimi i Lirisë”. Një rast i konfirmuar i meningjitit dhe mosveprimi i autoriteteve ka nxitur protesta nga prindërit gjatë kësaj të enjte. Ata kërkojnë masa të rrepta, si dezinfektimi i shkollës ose mbyllja e përkohshme.
“Është një situatë e rëndë, duke ditur dhe rrezikun që ka kjo sëmundje. Unë nuk i kam sjellë sot fëmijët në shkollë, është vendimi im personal dhe i disa prindërve të tjerë. Klasat sot kanë qenë me 7-8 nxënës dhe janë bashkuar për të zhvilluar mësimin. Duhet të merren masa të rrepta, të bëhet dezinfektimi i shkollës dhe nëse është e nevojshme, të mbyllet shkolla për një ose dy javë”, tha një prind për mediat.
Fëmijët janë të frikësuar pas vdekjes së një nxënësi 14-vjeçar, dhe disa prindër ankohen për mungesën e informacionit nga mësuesit. Disa shkolla po shqyrtojnë mundësinë e mësimit online, por prindërit nuk e shohin si zgjidhje të përshtatshme.
Akoma nuk ka një deklaratë zyrtare nga autoritetet.
