Álvaro Arbeloa është ndëshkuar nga Federata Angleze e Futbollit pas deklaratave të forta të bëra në përfundim të ndeshjes së Fulhamit ndaj Manchester United.
FA ka konfirmuar se trajneri spanjoll është gjobitur me 25 mijë paund, afro 30 mijë euro, si dhe ka marrë një paralajmërim zyrtar për komentet e tij ndaj arbitrimit.
Arbeloa kishte akuzuar gjyqtarin se shumica e vendimeve kishin favorizuar Manchester United, duke shkuar edhe më tej me pretendimin se “nuk do ta linin United të humbiste”.
“Unë e dija që nga ndeshja ndaj Manchester Cityt se nuk do ta linin Manchester United të humbiste. Mendoj se meritonim më shumë”, kishte deklaruar ai pas takimit.
Sipas komisionit të pavarur që shqyrtoi çështjen, komentet e tij konsiderohen të papërshtatshme dhe si një vënie në dyshim e paanshmërisë dhe integritetit të arbitrimit.
Trajneri i Fulhamit i pranoi akuzat, diçka që u vlerësua pozitivisht nga komisioni, i cili gjithashtu e paralajmëroi të mos përsërisë deklarata të ngjashme në të ardhmen.
Arbeloa po kalon një periudhë të vështirë edhe në aspektin sportiv. Fulham ndodhet në fund të tabelës së Premier League me vetëm dy pikë pas gjashtë ndeshjesh dhe ende nuk ka regjistruar fitoren e parë në kampionat.
