Katër persona janë arrestuar nga autoritetet greke në lidhje me shpërthimin në rafinerinë e kompanisë Motor Oil, në Agioi Theodoroi, pranë Korinthit, ku një punonjës humbi jetën dhe një tjetër mbeti i plagosur rëndë.
Sipas mediave greke, fillimisht u arrestua një 59-vjeçar, përgjegjës për mbikëqyrjen e punimeve, ndërsa më vonë u kryen edhe tre arrestime të tjera. Të arrestuarit e rinj janë një 36-vjeçar që ushtronte detyrën e përgjegjësit të punimeve, një 50-vjeçar përgjegjës për sigurinë dhe shëndetin në punë, si dhe një 34-vjeçar, operator i punimeve. Për një tjetër person, 67 vjeç, raportohet se vijojnë kërkimet.
Sipas autoriteteve, ndaj të arrestuarve është ngritur dosje për veprat penale të shkaktimit të shpërthimit dhe dëmtimit me rrezik të përgjithshëm. Hetimet synojnë të përcaktojnë përgjegjësitë për aksidentin e rëndë që ndodhi gjatë punimeve të mirëmbajtjes në ambientet e rafinerisë.
Dyshimet për shkakun e shpërthimit
Sipas raportimeve të mediave greke, ngjarja ndodhi gjatë punimeve të planifikuara të mirëmbajtjes në një njësi të rafinerisë. Dyshohet se pati një çlirim të menjëhershëm të presionit të gazit, pa ndezje, duke bërë që një kapak të shkëputej me forcë të madhe dhe të godiste dy punonjësit. Shkaku i saktë dhe përgjegjësitë përkatëse mbeten objekt hetimi.
Dy punonjësit, 43 dhe 50 vjeç, u transportuan fillimisht në spitalin e Korinthit dhe më pas në një spital në Athinë. 43-vjeçari nuk arriti t’u mbijetojë plagëve, ndërsa 50-vjeçari shqiptar humbi jetën ditë e sotme.
Kompania Motor Oil ka deklaruar se po bashkëpunon plotësisht me autoritetet për zbardhjen e rrethanave të ngjarjes. Hetimet pritet të përcaktojnë nëse janë shkelur rregullat e sigurisë gjatë punimeve dhe nëse ka përgjegjësi penale për personat e përfshirë.
