Ditën e hënë, disa orë pasi Erion Veliaj u izolua në Bllokun e Sigurisë, në rrugën “Mine Peza”, një grup qytetarësh u shfaqën para hyrjes së burgut duke kënduar këngën “Ra Faja prej fikut”.
Pak orë më vonë, policia shoqëroi disa prej tyre dhe nisi procedimin penal ndaj 8 qytetarëve, me akuzën se kishin “prishur rendin dhe qetësinë publike”.
Ndërkohë, gjatë ditës së sotme, qindra punonjës dhe zyrtarë të Bashkisë Tiranë rrethuan godinën e GJKKO dhe SPAK nga mëngjesi deri në mbrëmje, duke brohoritur “Lali Eri o flori, ne te presim ne bashki”.
Çuditërisht, rrethimi i godinës së GJKKO nga qindra punonjës të Bashkisë Tiranë, të cilët paguhen me taksat e qytetarëve, nuk u konsiderua si shkelje e ligjit nga Policia e Shtetit. Po ashtu, policia nuk shfaqi shqetësim për praninë e tyre, pasi ndryshe nga protestat e mëparshme para SPAK, këtë herë nuk ishte vendosur asnjë kordon policor për të ruajtur sigurinë.
