Presidenti Donald Trump është pyetur nga gazetarët në Shtëpinë e Bardhë pas takimit kokë më kokë me mbretin e Jordanisë për planin e shpërnguljes së palestinezëve nga Gaza.
I pyetur nëse ka pasur bisedime në lidhje me vendosjen e palestinezëve të Gazës në shtete të tjera veç Jordanisë dhe Egjiptit, mes tyre Shqipëria dhe Indonezia, Trump u përgjigj “po sigurisht”.
Ai shtoi se ka pasur edhe shumë shtete të tjera që kanë dashur të përfshihen, ndërsa tha se ka shumë njerëz, mes tyre edhe mbreti i Jordanisë që duan të ndihmojnë në strehimin e palestinezëve të Gazës.
Nga ana tjetër Mbreti i Jordanisë thotë më pas se ka dijeni se edhe vende Evropiane duan të përfshihen në këtë operacion.
Ndërkohë Rama para disa ditësh mohoi lajmin se palestinezët do të vijnë në Shqipëri. Ai iu përgjigj një komenti në rubrikën “Sy m’Sy” i cili thoshte: “Votoni Ramën dhe do të prisni 100 mijë palestinezë”.
Përgjigjja e Ramës
“Po pse, për çfarë arsye? Apo se kështu ka ardhur një zë kua…kua nga këneta. Jo Visar, nuk është e vërtetë! Është sajesë që mori rrugën me shpejtësi, sepse jemi në atë kohë kur e vërteta s’ka veshur pantallonat, ku gënjeshtra bën xhiron e botës. E vërteta është pak e mërzitshme. Prirja për të besuar lezetet e gënjeshtrës është më e madhe. Rrej, rrej, rrej dhe bëj qejf”.
