Një prej këngëve më të njohura të interpretuara nga Shkurte Fejza nuk gjendet më në YouTube, duke rikthyer në vëmendje debatin për të drejtat e autorit. Bëhet fjalë për “Mora fjalë”, këngën ikonike që është interpretuar ndër vite nga shumë këngëtarë, por që është bërë veçanërisht e njohur në versionin e Shkurte Fejzës.
Heqja e këngës nga YouTube ka ardhur pas një kërkese për të drejtat e autorit nga Naim Gjoshi, autori i tekstit dhe muzikës së saj. Bëhet fjalë për një këngë që ka grumbulluar miliona shikime në platformë. Një prej publikimeve më të njohura kishte kaluar 32 milionë shikime, ndërsa një tjetër kishte mbi 14 milionë.
Çështja e të drejtave mbi këngën nuk është e re. Prej vitesh, Gjoshi ka folur publikisht për të drejtat dhe përfitimet që lidhen me “Mora fjalë”, madje kishte paralajmëruar edhe mundësinë e bllokimit të këngës në YouTube. Megjithatë, pavarësisht debatit rreth të drejtave, Gjoshi ka shprehur edhe vlerësimin e tij për Shkurte Fejzën dhe interpretimin e saj.
Sipas tij, edhe pse “Mora fjalë” është kënduar nga shumë artistë ndër vite, “vulën” e këngës ia ka vendosur pikërisht Shkurte Fejza. Tashmë, heqja e këngës nga YouTube ka rikthyer edhe një herë në vëmendje çështjen e të drejtave të autorit dhe përfitimeve që lidhen me një prej këngëve më të njohura të repertorit shqiptar.
