Nuk është gjithmonë e nevojshme të kaloni orë të tëra duke medituar apo ushtruar për t’u ndier më mirë. Sipas një artikulli të BBC-së, edhe disa praktika shumë të shkurtra, që zgjasin vetëm disa sekonda, mund të ndikojnë pozitivisht në humor dhe mirëqenie.
Këto njihen si “micropractices” – zakone të vogla që mund të futen lehtësisht në rutinën e përditshme.
Një prej tyre është e qeshura. BBC sjell si shembull “yoga të të qeshurës”, e cila nis me ushtrime frymëmarrjeje dhe më pas me të qeshur të qëllimshme. Edhe pse në fillim mund të duket artificiale, e qeshura shpesh kthehet në të qeshur të natyrshme.
Një tjetër teknikë është prekja qetësuese e vetes. Në një studim të përmendur nga BBC, pjesëmarrësit vendosën duart mbi zemër dhe bark dhe për disa sekonda u përqendruan te ndjesia e ngrohtësisë dhe te mendimet pozitive për veten. Praktika u shoqërua me nivele më të ulëta të kortizolit, hormonit që lidhet me stresin.
Edhe frymëmarrja e vetëdijshme mund të bëhet pjesë e këtyre pushimeve të shkurtra. Ideja është të ndaloni për pak çaste, të merrni frymë ngadalë dhe të riktheni vëmendjen te momenti.
Ekspertët theksojnë se nuk ekziston një teknikë që funksionon njësoj për të gjithë. Qëllimi është të gjeni një praktikë të vogël që mund ta përshtatni me rutinën tuaj, qoftë gjatë një dite të ngarkuar në punë, gjatë një shëtitjeje apo para gjumit.
