Ministria e Mbrojtjes ka publikuar përditësimin e fundit mbi situatën e zjarreve në vend, deri në orën 14:00.
Sipas të dhënave zyrtare, gjatë ditës janë raportuar 18 vatra zjarri, prej të cilave 5 vijojnë të jenë aktive, ndërsa 7 të tjera po monitorohen nga strukturat e emergjencave.
Situata më e vështirë raportohet në Malin e Dajtit, ku vijon ndërhyrja për izolimin dhe shuarjen e flakëve.
Në qarkun e Pukës situata paraqitet më e qetë. Vatrat e zjarrit në Gjegjan, Gojan të Vogël dhe Gojan të Madh janë shuar plotësisht.
Ndërkohë, zjarri në Prozhëm është drejt neutralizimit.
Në Qarkun Dibër vijojnë aktive vatrat në Ballenjë dhe Qafën e Helmës, por edhe në këto zona nuk raportohet rrezik për banesat. Në Bërshi, zjarri është shuar.
Në Qarkun Lezhë, autoritetet kanë arritur të shuajnë vatrat në Lufaj dhe Shtuf, ndërsa zonat e Kalivaçit dhe Tenës vijojnë të mbahen nën monitorim.
Ndërhyrje dhe monitorim po kryhet gjithashtu në qarqet Elbasan dhe Vlorë.
Ndërkohë, një vatër e re është aktivizuar në Malin e Luzatit, në Tepelenë, ku shërbimet zjarrfikëse lokale kanë nisur ndërhyrjen për izolimin e flakëve.
