Një shofer pranë Tuluzës, në jug të Francës, bëri një zbulim të pazakontë teksa po përpiqej të ndërronte baterinë e makinës së tij: një boa rreth 1.5 metra e gjatë ishte fshehur nën kapakun e automjetit.
Sipas zjarrfikësve të Haute-Garonne, makina kishte qëndruar e parkuar dhe nuk ishte përdorur për rreth një muaj. Kur shoferi hapi kapakun për të kontrolluar baterinë, hasi papritur gjarprin.
Pesë zjarrfikës, përfshirë dy pjesëtarë të njësisë së specializuar RAN për shpëtimin e kafshëve, ndërhynë për ta nxjerrë me kujdes boën nga automjeti. Gjarpri u vendos më pas në një enë të posaçme.
Boa, e cila mund të arrijë mbi tre metra gjatësi, është një specie vendase e Amerikës së Jugut, ku gjendet në një zonë që shtrihet nga Kolumbia deri në Argjentinë.
Zjarrfikësit publikuan pamjet e operacionit në rrjetet sociale, duke kërkuar informacion për origjinën e kafshës. Boa iu dorëzua më pas një shkolle veterinare lokale.
Ekspertët theksojnë se temperaturat e larta favorizojnë mbijetesën e gjarpërinjve ekzotikë jashtë habitatit të tyre natyror. Valët e njëpasnjëshme të të nxehtit që kanë përfshirë Francën kohët e fundit mund të kenë krijuar kushte më të përshtatshme për kafshë të tilla të arratisura.
