Hakmarrja për një konflikt të ndodhur rreth 15 vite më parë dyshohet se qëndron pas atentatit të dështuar ndaj Ermir Këndezit, i njohur si Mir Bitoci, në Elbasan. Autori i dyshuar, 52-vjeçari Poli Boriçi, ka treguar para hetuesve motivin që, sipas tij, e shtyu drejt sulmit.
Ngjarja ndodhi pasditen e së shtunës në një lokal të qytetit, ku Boriçi dhe 50-vjeçari ndodheshin në të njëjtin ambient. Në një moment, 52-vjeçari dyshohet se është afruar dhe i ka drejtuar armën Këndezit.
Atentati nuk u realizua pasi pistoleta dyshohet se u bllokua pikërisht në momentin kur Boriçi tentoi të qëllonte. Këndezi arriti të largohej pa pësuar dëmtime.
Pas arrestimit, 52-vjeçari ka pretenduar para hetuesve se veprimi ishte nxitur nga një ngjarje e ndodhur vite më parë.
“E bëra për t’u hakmarrë për vëllain tim, të cilin e ka plagosur 15 vite më parë”, mësohet të ketë deklaruar ai.
Sipas versionit të Boriçit, vëllai i tij kishte pësuar pasoja të rënda shëndetësore pas plagosjes dhe më pas kishte mbetur i paralizuar. Pikërisht kjo ngjarje dyshohet se kishte mbetur burim konflikti dhe e kishte shtyrë 52-vjeçarin të kërkonte hakmarrje.
Nga ana tjetër, Mir Bitoci ka dhënë një version tjetër për marrëdhëniet mes palëve. Ai ka deklaruar se mosmarrëveshjet mes dy familjeve konsideroheshin të mbyllura dhe se gjatë viteve të fundit nuk kishte pasur konflikte mes tyre.
Pas atentatit të dështuar, Boriçi u largua nga vendngjarja, por u lokalizua dhe arrestua pak kohë më vonë nga policia.
Hetuesit po vijojnë marrjen e dëshmive dhe administrimin e provave për të rindërtuar plotësisht dinamikën e ngjarjes dhe për të verifikuar motivin e deklaruar nga 52-vjeçari.
