Një statistikë interesante ka rënë në sy gjatë analizës vjetore të punës së Policisë së Elbasanit. Gjatë analizës, u vu re se gjatë vitit që lamë pas (2024) nuk ka pasur vrasje.
Në qarkun Elbasan nuk është shënuar asnjë vrasje vetëm në vitin 1989, pra 34 vite më parë.
Kjo statistikë për parametrat e sigurisë së qarkut Elbasan, vjen vetëm disa vite, pasi më herët ky qark konsiderohej “Palermo” e Shqipërisë dhe u trondit nga disa ngjarje të rënda, me protagonistë njerëz të fuqishëm nga bota e krimit, që janë goditur nga drejtësia e re.
Statistika mjaft domethënëse u theksua edhe sot nga Drejtori i Policisë së Shtetit Ilir Proda. Ai ka vlerësuar punën profesionale hetimore të këtyre strukturave policore, për parandalimin e ngjarjeve kriminale dhe dokumentimin ligjor të veprimtarisë së grupeve kriminale.
“Përgëzoj strukturat e Policisë së qarkut Elbasan sepse rritja e forcës parandaluese mundësoi që gjatë vitit 2024 në këtë qark mos të ketë asnjë vrasje. Ky rezultat nuk ishte shënuar në këtë qark që nga viti i largët 1989”, deklaroi Proda.
