Jola Hysaj, ish-sekretare për Marrëdhëniet me Publikun në Partinë Demokratike, është emëruar drejtoreshë e Agjencisë Kombëtare të Turizmit.
Emërimi vjen vetëm pak muaj pasi Hysaj u largua nga Partia Demokratike. Në mars të këtij viti, ajo dha dorëheqjen nga detyra e sekretares për Marrëdhëniet me Publikun dhe njëkohësisht njoftoi largimin nga partia, duke argumentuar se zhvillimet dhe mënyra e funksionimit të strukturave drejtuese nuk përputheshin më me parimet e një force politike demokratike.
Në një reagim të gjatë të publikuar në Facebook, Hysaj shprehej se funksioni i saj ishte zbrazur nga kompetencat reale, ndërsa përgjegjësia dhe ekspozimi publik i postit vijonin të mbeteshin të pandryshuara.
Ajo ngriti kritika edhe për mënyrën e përzgjedhjes së kandidatëve për këshillat bashkiakë, duke folur për përjashtimin sistematik të individëve me integritet dhe kompetencë, si dhe për hartimin e listave të mbyllura në Qarkun e Durrësit.
Sipas saj, mungesa e hapjes dhe transparencës brenda Partisë Demokratike ishte bërë një problem serioz, duke theksuar se vendime të rëndësishme shpesh merreshin pa u diskutuar në strukturat e partisë dhe mësoheshin fillimisht përmes mediave.
“Pas më shumë se 20 vitesh angazhimi të pandërprerë në jetën politike dhe në shërbim të qytetarëve, kam marrë vendimin të jap dorëheqjen nga të gjitha pozicionet që kam mbajtur dhe që më janë besuar me votë, si edhe nga anëtarësia ime në Partinë Demokratike të Shqipërisë. Ky është një vendim i vështirë, por i domosdoshëm… Për të gjitha këto arsye, kam vendosur të largohem, duke ruajtur mbi të gjitha integritetin tim personal dhe politik”, shkruante Hysaj në njoftimin e saj të dorëheqjes.
Me emërimin në krye të Agjencisë Kombëtare të Turizmit, Hysaj rikthehet në një funksion publik vetëm disa muaj pas largimit nga opozita.
