Manchester City ka zyrtarizuar transferimin e Elliot Anderson nga Nottingham Forest për 116 milionë paund. Mesfushori 23-vjeçar ka nënshkruar kontratë deri në qershor të vitit 2031.
Anderson tregoi se nuk kishte asnjë dyshim sapo mësoi për interesimin e “Qytetarëve”.
“Sapo mora vesh se City më dëshironte, isha plotësisht i vendosur që ky transferim të realizohej. Dua ta testoj veten në nivelin më të lartë dhe këtu e kam këtë mundësi”, deklaroi anglezi.
Manchester City pagoi shumën më të lartë në historinë e klubit, duke kaluar 100 milionë paundët e shpenzuar për Jack Grealish. Për lojtarin kishte shfaqur interes edhe Manchester United.
Anderson u bë një nga mesfushorët më të rëndësishëm të Nottingham Forest, ndërsa sezonin e kaluar udhëhoqi Premier League në prekje të topit dhe duele të fituara. Ai ishte gjithashtu titullar i rregullt me Anglinë në Kupën e Botës.
Te City, 23-vjeçari do të punojë nën drejtimin e Enzo Marescas, i cili mori drejtimin e skuadrës pas largimit të Pep Guardiolës.
