Drejtuesit e rinj të futbollit italian kanë folur hapur për të ardhmen e kombëtares dhe për kërkimin e trajnerit të ri të “Të Kaltërve”.
Gjatë Asamblesë së Serie A, Giovanni Malagò, Paolo Maldini dhe Leonardo prezantuan projektin e tyre për ringritjen e futbollit italian, ndërsa një nga temat kryesore ishte emri i trajnerit të ardhshëm.
Maldini konfirmoi se Pep Guardiola është një nga objektivat kryesorë, por zbuloi se drejtuesit kanë zhvilluar bisedime edhe me Carlo Ancelottin.
“Do të ishte ideale ta emëronim trajnerin këtë javë, por duhet të presim personin që duam vërtet. Guardiola është një nga objektivat tanë, por kemi folur edhe me Ancelottin. Na dukej e drejtë të nisnim nga më të mirët në botë dhe më pas të kuptonim gatishmërinë e tyre”, deklaroi Maldini.
Guardiola mbetet një pistë e vështirë, pasi pas largimit nga Manchester City ka shprehur dëshirën për të bërë një pushim dhe për t’i kushtuar më shumë kohë familjes. Megjithatë, Maldini dhe Leonardo kanë zhvilluar bisedime me të në Barcelonë për të kuptuar nëse mund të ndryshojë vendim.
Në listën e kandidatëve vazhdojnë të jenë edhe Andrea Pirlo dhe Roberto Mancini, por drejtuesit italianë nuk duan të nxitojnë. Objektivi i tyre është zgjedhja e një trajneri që përputhet plotësisht me projektin e ri të kombëtares.
