Sipas “Gazzetta dello Sport”, gara për stolin e kombëtares italiane nuk kufizohet vetëm te Andrea Pirlo dhe Roberto Mancini. Në listën e drejtuesve të rinj të Federatës Italiane është shfaqur edhe emri i Pep Guardiolës.
Paolo Maldini dhe Leonardo kanë kaluar fundjavën në Barcelonë, ku janë takuar me trajnerin katalanas për të kuptuar nëse ekziston mundësia që ai të marrë drejtimin e “Të Kaltërve”.
Megjithatë, marrëveshja duket shumë e vështirë. Guardiola ka deklaruar së fundmi se dëshiron të largohet përkohësisht nga futbolli, për t’i kushtuar më shumë kohë familjes dhe jetës personale. Për këtë arsye, mundësia që ai të ndryshojë menjëherë vendim dhe të pranojë Italinë konsiderohet e vogël.
Presidenti i Federatës Italiane, Giovanni Malagò, ka pranuar se po vlerësohen edhe kandidatura të tjera, por ka theksuar se çdo trajner i madh duhet të jetë i interesuar dhe të ketë kërkesa financiare të përballueshme për buxhetin e federatës.
Nëse pista Guardiola mbyllet përfundimisht, Andrea Pirlo dhe Roberto Mancini mbeten dy kandidatët kryesorë për stolin e Italisë. Vendimi përfundimtar pritet të merret brenda pak ditësh.
