Anglia ka fituar medaljen e bronztë në Kupën e Botës 2026, pas një ndeshjeje spektakolare ndaj Francës, të mbyllur me rezultatin 6-4. Skuadra e Thomas Tuchel zhvilloi një pjesë të parë fantastike, ndërsa Franca reagoi fuqishëm pas pushimit, por pa arritur të përmbyste rezultatin.
Protagonisti i madh për anglezët ishte Bukayo Saka, autor i një triplete. Declan Rice dhe Ezri Konsa gjithashtu gjetën rrugën e rrjetës, duke i dhënë Anglisë një avantazh të madh që në pjesën e parë.
Ndeshja nisi menjëherë me ritëm të lartë. Declan Rice zhbllokoi rezultatin që në minutën e 3-të me një goditje nga jashtë zone, duke e lënë Maignan të palëvizur. Pak më vonë, Konsa dyfishoi avantazhin pas një goditjeje nga këndi, duke shënuar me kokë në shtyllën e parë.
Franca tentoi të reagonte me Mbappé, i cili iu afrua golit pas një pasimi të mirë nga Olise, por goditja e tij përfundoi ngjitur me shtyllën. Megjithatë, prapavija franceze ishte shumë e pasigurt dhe Anglia e shfrytëzoi maksimalisht.
Saka shënoi golin e parë personal pas një aksioni të shpejtë të anglezëve, ndërsa më pas realizoi sërish me një goditje të ulët dhe të saktë, duke e çuar Anglinë në avantazh të thellë para pushimit.
Në pjesën e dytë, pamja e ndeshjes ndryshoi plotësisht. Didier Deschamps kreu katër zëvendësime dhe Franca u shfaq shumë më agresive. Mbappé ngushtoi diferencën në fillimin e fraksionit të dytë, pas një pasimi të bukur nga Olise.
Më pas Barcola shtoi edhe një tjetër gol për Francën, pas një asistimi të shkëlqyer nga Mbappé. Kapiteni francez vazhdoi spektaklin personal duke shënuar sërish, në një aksion të bukur të sulmit francez.
Me këtë dygolësh, Mbappé arriti kuotën e 10 golave në këtë Botëror dhe u ngjit në vendin e parë të renditjes së golashënuesve të turneut. Ai gjithashtu shkroi historinë, duke u bërë golashënuesi më i mirë i të gjitha kohërave në historinë e Kupës së Botës me 22 gola.
Në fundin e ndeshjes, Anglia fitoi një penallti pas ndërhyrjes së Malo Gusto ndaj Spence në zonë. Saka u tregua i saktë nga pika e bardhë, kompletoi tripletën personale dhe i dha qetësi skuadrës së Tuchel.
Franca nuk u dorëzua deri në fund dhe në kohën shtesë shënoi edhe golin e katërt me Dembélé, pas një topi të rikuperuar nga Upamecano. Megjithatë, ishte shumë vonë për të ndryshuar fatin e sfidës.
Anglia mbyll kështu Botërorin me medaljen e bronztë, ndërsa Franca i jep lamtumirën turneut me një humbje spektakolare, në ndeshjen e fundit të Didier Deschamps në krye të kombëtares.
