Presidenti i Shteteve të Bashkuara, Donald Trump, ka pranuar se kishte ndërhyrë personalisht te Gianni Infantino për rastin e kartonit të kuq ndaj Folarin Balogun, gjatë një prej episodeve më të diskutuara të Kupës së Botës.
Në një pritje në “Trump Tower” në New York, ku ishte i pranishëm edhe presidenti i FIFA-s, Trump foli me tone të qeta dhe batuta për suksesin e turneut, të cilin e cilësoi si “më të madhin në histori”.
Sipas tij, Botërori ka thyer rekorde të mëdha në pjesëmarrje dhe audiencë, ndërsa sugjeroi me humor se Shtetet e Bashkuara duhet ta organizojnë sërish turneun e ardhshëm, këtë herë pa Meksikën dhe Kanadanë.
“Ka qenë kaq i suksesshëm, sa mendoj se duhet të zgjedhim sërish SHBA-në dhe t’i lëmë jashtë Meksikën dhe Kanadanë. Ishte bukur që i kishim, por për tjetrin zgjedhim dikë tjetër”, tha Trump.
Më pas ai u ndal te episodi i kartonit të kuq të Balogun, duke pranuar se kishte telefonuar Infantinon për të shprehur pakënaqësinë e tij.
“U detyrova të telefonoja Giannin dhe t’i bëja një rekomandim. Lëreni atë djalë ta përfundojë ndeshjen! Jo, nuk ia thashë ashtu. I thashë: dua të paraqes një ankesë. Nuk e dija çfarë do të ndodhte, por më mirë që përfundoi kështu, sepse nuk ka më polemika: ata e fituan ndeshjen”, u shpreh presidenti amerikan.
Në krah të tij, Infantino qeshi gjatë komenteve, ndërsa më herët kishte vlerësuar organizimin dhe ndikimin global të Kupës së Botës.
Trump e mbylli fjalimin duke i uruar fat dy finalisteve të mëdha, Spanjës dhe Argjentinës, që do të përballen të dielën në “MetLife Stadium” në New Jersey.
“Fat të mirë Spanjës dhe Argjentinës të dielën. Le të fitojë skuadra më e mirë”, përfundoi Trump.
Finalja e Botërorit pritet të jetë kulmi i një turneu që në SHBA është kthyer jo vetëm në spektakël sportiv, por edhe në një ngjarje të madhe politike, ekonomike dhe mediatike.
