Barcelona ka marrë një lajm aspak të mirë pas eliminimit të Holandës nga Kupa e Botës 2026.
Sipas Marca, Frenkie de Jong është rikthyer në Barcelonë me një dëmtim serioz në gju. Stafi mjekësor i klubit katalanas po kryen ende ekzaminime të tjera, por shqetësimi është i madh, pasi mesfushori holandez mund të qëndrojë jashtë fushave deri në katër muaj.
Ky është një problem i rëndësishëm për Barcelonën, që rrezikon ta nisë sezonin pa një nga lojtarët më të rëndësishëm të mesfushës. De Jong mbetet një element kyç për ekuilibrin dhe ndërtimin e lojës së katalanasve, ndaj mungesa e tij do të ishte një goditje e rëndë për trajnerin.
Ndërkohë, situata te Barcelona mbetet e nxehtë edhe në merkato. Ferran Torres mund të largohet nga klubi, pasi drejtuesit katalanas janë të hapur për shitjen e tij. Kontrata e sulmuesit spanjoll skadon në verën e vitit 2027, por mungesa e progresit për rinovimin ka shtuar dyshimet për të ardhmen e tij.
Barcelona pritet të marrë një vendim për Ferranin pas Kupës së Botës, ndërsa tani shqetësimi kryesor mbetet gjendja e Frenkie de Jong dhe koha e rikuperimit të tij.
