Dikur Juventus bënte goditje që tronditnin merkaton botërore, si transferimi i Cristiano Ronaldos nga Real Madridi. Sot, bardhezinjtë po hasin vështirësi edhe për të rikthyer Randal Kolo Muanin, një sulmues cilësor, por shumë larg peshës dhe madhështisë së pesë herë fituesit të “Topit të Artë”.
Tetë vite pas ardhjes së CR7 në Torino, më 10 korrik 2018, Juventusi duket një klub krejt tjetër. Atëherë flitej për “goditjen e shekullit”, ndërsa tani për një telenovelë të pafundme me PSG-në për Kolo Muanin, që ende nuk është mbyllur në kohë për nisjen e grumbullimit.
Në më pak se një dekadë, klubi ka kaluar nga kulmi i ambicies në një fazë pasigurie të madhe sportive dhe financiare. Juventus nuk fiton Serie A që nga viti 2020, kur mbylli ciklin e nëntë titujve radhazi me Maurizio Sarrin në stol, ndërsa trofeu i fundit mbetet Kupa e Italisë në vitin 2024 me Massimiliano Allegrin.
Transferimi i Ronaldos për 105 milionë euro ishte qershia mbi tortë e një skuadre që vinte nga dy finale të Champions League. Portugezi shënoi 101 gola në tre vite, por nuk arriti ta çonte Juventusin drejt ëndrrës europiane. Më pas pandemia dhe gabimet e shumta në merkato e rënduan edhe më shumë projektin e nisur nga Andrea Agnelli, Pavel Nedved dhe Fabio Paratici.
Nga ai moment, te Juventus ndryshoi pothuajse gjithçka. Drejtues, trajnerë dhe lojtarë u zëvendësuan njëri pas tjetrit, por rezultatet nuk u rikthyen. Pas Sarrirt erdhi Pirlo, më pas Allegri, Thiago Motta, Igor Tudor dhe tani Luciano Spalletti. Në zyrat e klubit ndodhën gjithashtu shumë lëvizje, nga largimi i Paraticit te fundi i epokës Agnelli pas hetimeve për bilancet e klubit.
Edhe merkato nuk ka ndihmuar. Arthur, i ardhur në operacionin me Pjanic, mbetet ende një barrë për klubin. Koopmeiners, i blerë për 51 milionë euro, pritet të largohet pas dy sezonesh zhgënjyese, ndërsa Milik, David dhe Openda nuk kanë dhënë atë që pritej. Edhe porta, dikur simbol sigurie me emra si Zoff, Buffon dhe Szczesny, është kthyer në një tjetër problem për t’u zgjidhur.
Sot, Juventus është ende Juventus, por pesha e tij në merkato nuk është më ajo e dikurshmja. Nga Cristiano Ronaldo te Kolo Muani, rruga tregon më shumë se një ndryshim emrash: tregon rënien e një projekti që dikur synonte Europën dhe sot po përpiqet të rindërtojë veten nga e para.
