Gavi ka folur me respekt të madh për Cristiano Ronaldon në prag të përballjes së madhe mes Spanjës dhe Portugalisë në fazën e 16 më të mirave të Kupës së Botës.
Ylli i Barcelonës ka hedhur poshtë kritikat ndaj kapitenit portugez, duke theksuar se ato vijnë kryesisht nga persona jashtë skuadrës dhe jo nga lojtarët që ndajnë dhomën e zhveshjes me të.
“E dëgjoj gjithmonë këtë, por nga njerëz që nuk janë në skuadrën e tij, nga tifozët. Ata që janë në ekipin e tij kanë respekt të jashtëzakonshëm për të. Cristiano është një nga lojtarët më të mirë në histori dhe mund të bëjë diferencën në çdo moment”, u shpreh Gavi për Mundo Deportivo.
Mesfushori spanjoll e cilësoi Portugalinë si kundërshtarin më të fortë që Spanja ka hasur deri tani në këtë Botëror.
“Është e qartë që ata janë kundërshtari më i fortë me të cilin jemi përballur deri tani. Janë një kombëtare e madhe, me lojtarë shumë të mirë. Duhet të jemi të fokusuar te plani i trajnerit dhe të qëndrojmë të bashkuar për ta fituar këtë ndeshje”, tha ai.
Gavi foli edhe për mesfushën portugeze, duke pranuar cilësinë e rivalëve, por duke theksuar se Spanja ka gjithashtu një grup shumë të fortë dhe të gjerë.
“Ata kanë një mesfushë shumë të mirë, por edhe ne kemi lojtarë shumë të mirë. Gjëja më e rëndësishme është që kemi një skuadër të madhe, me shumë futbollistë cilësorë”, shtoi lojtari i Barcelonës.
Mesfushori 21-vjeçar u ndal edhe te kritikat ndaj stilit të tij të lojës, duke pranuar se intensiteti dhe duelet e forta janë pjesë e identitetit të tij.
“Ndoshta shumë njerëz më presin në gabim sepse jam një lojtar që futem fort në duele dhe jo të gjithëve u pëlqen ky lloj futbollisti. Unë e konsideroj veten një lojtar shumë të kompletuar. Konkurrenca dhe intensiteti janë cilësitë e mia më të mira. Nuk do të ndryshoj kurrë”, deklaroi Gavi.
Në fund, ai theksoi se është gati të ndihmojë Spanjën në çdo mënyrë, pavarësisht nëse luan titullar apo futet nga stoli.
“Jam këtu për të ndihmuar skuadrën. E di besimin që ka trajneri tek unë. Botërorët fitohen nga skuadrat që qëndrojnë të bashkuara në momentet e mira dhe të vështira”, përfundoi Gavi.
