Edhe këtë mëngjes, dhjetëra udhëtarë janë përballur me radhë të gjata në Pikën e Kalimit Kufitar të Kapshticës. Prej rreth shtatë muajsh, kalimi drejt Greqisë është shoqëruar me vonesa të konsiderueshme, ku pritja varion nga një orë, deri në tre orë në periudhat me fluks më të lartë.
Shkak i kësaj situate mbeten procedurat e reja të kontrollit të aplikuara nga autoritetet greke në pikën kufitare të Krystallopigisë, të cilat kanë ngadalësuar ndjeshëm përpunimin e udhëtarëve.
Gjatë kësaj periudhe janë regjistruar disa herë edhe probleme me sistemin kompjuterik të palës greke, duke rënduar më tej situatën dhe duke krijuar radhë të gjata automjetesh. Edhe ditët e fundit është raportuar një tjetër defekt i sistemit, që ka sjellë pritje deri në tre orë.
Udhëtarët shprehen të shqetësuar për vonesat e vazhdueshme, duke kërkuar që autoritetet e të dy vendeve të ndërhyjnë për të gjetur një zgjidhje, veçanërisht gjatë sezonit veror, kur fluksi i lëvizjeve në kufirin greko-shqiptar rritet ndjeshëm.
