Lamine Yamal nuk e ka fshehur dëshirën për të parë Julián Álvarez me fanellën e Barcelonës. Talenti spanjoll ka folur hapur për sulmuesin argjentinas dhe e ka ftuar publikisht të bashkohet me klubin katalanas.
Në një intervistë për Cadena SER, Yamal vlerësoi shumë cilësitë e Álvarez dhe tha se dhoma e zhveshjes së Barcelonës do ta priste me krahë hapur nëse ai do të vendoste të transferohej në Katalonjë.
“Nëse vjen, do ta presim me krahë hapur. Është një futbollist fantastik dhe shpresoj të luajmë bashkë. Nëse dëshiron të vijë, ne do ta presim. Hajde, bëje hapin”, u shpreh Yamal për mundësinë e transferimit të argjentinasit.
18-vjeçari shtoi gjithashtu se Barcelona do të ishte zgjedhja më e mirë për karrierën e Julián Álvarez. Sipas tij, historia e klubit, tifozët dhe qyteti e bëjnë Barcelonën një nga vendet më të mira në botë për çdo futbollist.
Álvarez aktualisht është i impenjuar me Argjentinën në Kupën e Botës 2026, por deri tani nuk ka arritur të lërë gjurmë me gol apo asist në turne.
Deklaratat e Yamal vijnë në një moment kur emri i sulmuesit argjentinas vazhdon të lidhet me merkaton, ndërsa Barcelona mbetet gjithmonë në kërkim të përforcimeve të rëndësishme në sulm.
