Real Madrid vazhdon punën në merkato për të forcuar skuadrën sipas kërkesave të José Mourinhos, por çdo lëvizje e re do të varet edhe nga largimet.
Reparti që ka shqetësuar më shumë trajnerin portugez është mbrojtja. Këtë e tregojnë edhe afrimet e Konatés, Cucurellas dhe Dumfries, por plani i madrilenëve nuk mbyllet këtu.
Sipas raportimeve, Real Madrid po punon për të afruar edhe një tjetër qendërmbrojtës, dhe emri që po fiton gjithnjë e më shumë terren është Alessandro Bastoni.
Mbrojtësi 27-vjeçar i Interit shihet si profili ideal për Mourinhon: një lojtar me eksperiencë, i fortë në duele dhe i gatshëm për të qenë titullar menjëherë në një skuadër me ambicie të mëdha.
Marrëdhëniet mes Real Madrid dhe Interit janë shumë të mira, gjë që mund të ndihmojë në negociata. Klubi italian është në dijeni të interesimit të madrilenëve, por edhe të dëshirës së Bastonit për të provuar një aventurë të re.
Gjatë sezonit, Interi i kishte dhënë mbrojtësit leje për të shqyrtuar të ardhmen e tij. Bastoni kishte pasur kontakte edhe me Barcelonën, por ato bisedime nuk sollën një marrëveshje konkrete.
Tani situata ka ndryshuar. Rikthimi i Mourinhos te Real Madrid ka bërë që Bastoni të vendosë gjithçka në pritje, me dëshirën për të kuptuar nëse mundësia për të veshur fanellën e bardhë mund të bëhet reale.
Real Madrid e vlerëson shumë profilin e tij, sidomos pas dëmtimit të Schlotterbeck, i cili e ka nxjerrë atë jashtë planeve për një transferim në Bernabéu. Për këtë arsye, pista Bastoni është bërë edhe më e rëndësishme.
Interi e pranon mundësinë e largimit të lojtarit, por nuk pritet ta lëshojë lehtë. Operacioni mund të kushtojë rreth 60 milionë euro, një shifër e lartë, por e përballueshme nëse Real Madrid arrin të krijojë hapësira me largime.
Për momentin, gjithçka është në lëvizje. Bastoni e di se Real Madrid e kërkon, Mourinho e sheh si përforcim kyç dhe Interi është gati të dëgjojë. Tani mbetet vetëm të shihet nëse “Operacioni Bastoni” do të kthehet në goditjen e radhës të madrilenëve.
