Manchester City ka zyrtarizuar trajnerin e ri. Klubi anglez ka njoftuar se Enzo Maresca do të marrë drejtimin e skuadrës, duke u rikthyer kështu në një ambient që e njeh mirë.
Sipas njoftimit të publikuar në faqen zyrtare të Manchester City në X, trajneri italian 46-vjeçar është emëruar si tekniku i ri i ekipit. Maresca ka firmosur një kontratë trevjeçare me kampionët anglezë.
Ai zëvendëson Pep Guardiolën, i cili largohet pas një dekade në krye të klubit. Gjatë kësaj periudhe, Guardiola ndërtoi një nga skuadrat më dominuese në futbollin europian dhe la pas një trashëgimi të madhe te City.
Maresca nuk është një emër i panjohur për klubin, pasi më parë ka qenë pjesë e stafit të Guardiolës. Më pas, ai vendosi të niste karrierën e tij si trajner i parë, duke drejtuar Leicester dhe Chelsea.
Eksperienca e tij më e fundit ishte te Chelsea, klub nga i cili u largua në janar të këtij viti. Tani, Maresca rikthehet te Manchester City me një përgjegjësi të madhe: të nisë një kapitull të ri pas epokës Guardiola.
