Chelsea ka shfaqur interes për transferimin e Granit Xhakës nga Sunderland, me trajnerin e ri Xabi Alonso që do të donte të ribashkohej me mesfushorin shqiptar.
Xhaka dhe Alonso kanë punuar më parë së bashku te Bayer Leverkusen, ku fituan Bundesligën dhe ndërtuan një raport shumë të mirë profesional. Tani, me Alonson që nis punën te Chelsea javën e ardhshme, emri i 33-vjeçarit është futur në listën e londinezëve.
Për momentin, nuk ka pasur ende kontakte mes dy klubeve dhe Sunderland nuk dëshiron të dëgjojë oferta, pasi e konsideron Xhakën të pashitshëm. Mesfushori u transferua te Sunderland verën e kaluar për 13 milionë paund dhe luajti një rol kyç në qëndrimin e klubit në Premier League.
Chelsea po kërkon lojtarë me eksperiencë dhe njohuri të Premier League, për të balancuar një skuadër me moshë mesatare shumë të re, rreth 23.8 vjeç. Xhaka shihet si një profil që mund të sjellë lidership, karakter dhe siguri në mesfushë.
Megjithatë, mosha e lojtarit pritet të ndikojë në vlerën e mundshme të operacionit. Xhaka mbush 34 vjeç në shtator dhe Chelsea nuk synon të paguajë një shumë të lartë për kartonin e tij.
Verën e kaluar, Xhaka kishte qenë i hapur për një rikthim në Londër, me West Ham që ishte një nga opsionet, por në fund vendosi të mos e ndiqte atë mundësi. Tani, interesi i Chelsea mund ta rikthejë sërish emrin e tij në qendër të merkatos angleze.
