Mario Kempes, një nga legjendat më të mëdha të futbollit argjentinas dhe kampion bote në vitin 1978, ka folur për momentin e Argjentinës në Kupën e Botës, formën e Lionel Messit dhe situatën e Julián Álvarez te Atlético Madrid.
Ish-sulmuesi argjentinas nuk i kurseu fjalët e mëdha për Messin, i cili po luan Botërorin e tij të gjashtë dhe ka surprizuar të gjithë me paraqitjet e tij.
“I jashtëzakonshëm. Askush nuk e priste. Mendonim se do të duhej të fliste me Scalonin për të parë sa minuta mund të luante, por ai i ka surprizuar të gjithë. Pesë gola në dy ndeshje dhe në moshën 39-vjeçare”, u shpreh Kempes.
Sipas tij, sekreti i Messit është mënyra si e lexon lojën dhe pozicionohet në fushë.
“Ai nuk vrapon aq shpejt sa shokët e skuadrës, por e di në mënyrë perfekte ku duhet të vendoset. Gjen gjithmonë hapësirën ku kundërshtarët nuk janë”, shtoi legjenda argjentinase.
Kempes foli edhe për Spanjën, të cilën e sheh si një kundërshtare të fortë, edhe pse me ulje-ngritje. Ai vlerësoi Lamine Yamal, por theksoi se Botërori është skena ku lojtarët e mëdhenj duhet ta provojnë veten.
“Lamine mund të jetë lojtari kyç i Spanjës, por ka edhe të tjerë. Pedri është ai që dikton ritmin e lojës dhe kontrollon topin për Spanjën”, tha Kempes.
Duke folur për Argjentinën, ai veçoi rolin e Enzo Fernández dhe Mac Allister në mesfushë, ndërsa theksoi se prania e Messit e ndryshon plotësisht mënyrën e lojës së skuadrës.
“Kur ia jep topin Messit, në çdo moment mund të ndodhë diçka e papritur”, u shpreh ai.
Një pjesë e rëndësishme e intervistës ishte edhe situata e Julián Álvarez, deklaratat e të cilit pas ndeshjes ndaj Austrisë kanë shkaktuar debat në Spanjë. Kempes kërkoi që mendimi i sulmuesit të respektohet.
“Nëse ai do të largohet dhe kjo është gjëja më e mirë për të dhe për Atlético Madrid, atëherë është fantastike. Ai ka qenë shumë produktiv për Atlético Madrid”, tha Kempes.
Ai shtoi se e kupton ndjeshmërinë e tifozëve të Atlético Madrid, por nuk mendon se Julián Álvarez ka gabuar.
“Nuk duhet të mendojmë keq për lojtarin. Ai thotë atë që ndien. Nuk mendoj se deshi të tregonte mungesë respekti për tifozët e Atlético Madrid”, theksoi Kempes.
Në fund, i pyetur për favoritët e Kupës së Botës, Kempes përmendi Francën, Anglinë dhe Spanjën, ndërsa Argjentinën e la jashtë analizës për shkak të lidhjes së tij natyrale me kombëtaren albiceleste.
