AC Milan ka finalizuar marrëveshjen për Gonçalo Ramos. Sulmuesi portugez do të largohet nga PSG dhe do të bëhet qendërsulmuesi i ri i kuqezinjve, në një operacion që pritet të jetë më i shtrenjti në historinë e klubit.
Shifra e transferimit, përfshirë bonuset, llogaritet mes 60 dhe 70 milionë eurove. Ramos, i cili aktualisht është i grumbulluar me Portugalinë në Kupën e Botës, ka kryer tashmë vizitat mjekësore.
Milan vendosi të përshpejtonte gjithçka në orët e fundit, për të shmangur konkurrencën e klubeve të tjera, mes tyre edhe Atlético Madrid. Klubi kishte nevojë për një sinjal të fortë në merkato dhe e ka bërë këtë me një investim historik.
Gonçalo Ramos ishte emri kryesor në listën e trajnerit Amorim, i cili e shihte si profilin ideal për sistemin e tij të lojës. Edhe vetë lojtari ka dhënë miratimin për transferimin, i bindur nga projekti i Milanit dhe mundësia për të punuar me trajnerin portugez.
Vendimtare ishte edhe prania e Gerry Cardinale në Milano, ku u zhvillua një takim merkatoje me drejtuesit e klubit. Pronësia dha dritën jeshile për operacionin, ndërsa marrëdhënia e mirë me Al-Khelaifin ndihmoi në avancimin e negociatave me PSG.
Ramos largohet nga Parisi pas tre sezonesh, ku fitoi 12 trofe, përfshirë dy Champions League, edhe pse nuk ishte gjithmonë titullar i padiskutueshëm. Me PSG-në, ai realizoi 45 gola.
Milan beson se ka siguruar vitet më të mira të karrierës së sulmuesit dhe se San Siro mund të jetë ambienti ideal për rritjen e tij. Klubi e ka ndjekur Ramos për më shumë se katër vite përmes skautëve dhe analizave të të dhënave, para se të vendoste për investimin e madh.
Tashmë pritet vetëm zyrtarizimi, por marrëveshja është mbyllur: Gonçalo Ramos do të jetë sulmuesi i ri i Milanit.
