Protesta kundër Qeverisë dhe kryeministrit Edi Rama ka hyrë në ditën e 26-të në Tiranë, ku qytetarët kanë vijuar marshimin drejt Kryeministrisë me thirrje për dorëheqje dhe ndryshim të sistemit politik.
Ndërkohë, Policia e Tiranës ka njoftuar procedimin penal të 11 protestuesve, pasi në dy ditët e fundit të protestës, sipas bluve të kryeqytetit, kanë “penguar lëvizja e lirë e automjeteve dhe qytetarëve”.
Mes të proceduarve është edhe Dritan Goxhaj.
Ndërsa ditën e sotme mazhoranca në Konferencën e Kryetarëve, nuk pranoi dy kërkesat e demokratëve për mocion me debat lidhur me rezolutën e Parlamentit Europian dhe kërkesat e qytetarëve që prej gati një muaji kërkojnë dorëheqjen e kryeministrit.
Socialistët thanë se nuk e njohin Partinë Demokratike si zëdhënëse të protestuesve, por për demokratët, arsyeja e vërtetë është se mazhoranca kërkon t’i shmanget llogaridhënies për keqqeverisjen.
