Raphinha ka reaguar me një mesazh emocionues pas dëmtimit që rrezikon ta lërë jashtë vazhdimit të Kupës së Botës me Brazilin.
Sulmuesi i Barcelonës u detyrua të largohej nga fusha gjatë fitores së Brazilit ndaj Haitit, pasi ndjeu shqetësime në këmbën e djathtë. Kontrollet mjekësore konfirmuan një dëmtim muskulor në kofshën e djathtë, duke vënë në dyshim pjesëmarrjen e tij në pjesën tjetër të turneut.
Federata Braziliane ka bërë me dije se lojtari do të qëndrojë me grupin dhe do të ndjekë një program intensiv rikuperimi. Pavarësisht situatës së vështirë, Raphinha nuk ka ndërmend të dorëzohet.
“Djali që ëndërronte të vishte fanellën e Brazilit është ende këtu. Me të njëjtat ëndrra, të njëjtën mirënjohje dhe të njëjtën dëshirë për të përfaqësuar vendin tonë”, shkroi ai në Instagram.
Ai shtoi se do të bëjë gjithçka për t’u rikuperuar sa më shpejt dhe për t’u rikthyer pranë skuadrës. “Dua të jem me shokët e mi, të luftoj për objektivat tanë dhe të vazhdoj të jap gjithçka për këtë fanellë”, u shpreh Raphinha.
Brazilit i mbetet ndeshja e fundit në grup ndaj Skocisë, por Raphinha nuk do të jetë i gatshëm për këtë sfidë. Ancelotti po shqyrton disa alternativa për ta zëvendësuar në krahun e djathtë të sulmit.
