Kryeministri Edi Rama ka ndarë këtë të mërkurë në rrjetet sociale mesazhin e një qytetari, i cili shpreh vlerësimin për ndryshimet e ndodhura në Shqipëri ndër vite, duke theksuar se ka tentuar ta shohë realitetin nga këndvështrimi i kreut të qeverisë.
Rama tha se ky është një nga mesazhet e shumta që ka marrë gjatë ditëve të fundit, ndërsa qytetari sqaron se nuk synon të bindë askënd apo të bëjë propagandë politike.
Ai tregon se është rritur në një Shqipëri me shumë vështirësi infrastrukturore dhe sociale, duke argumentuar se, pavarësisht kritikave dhe problemeve që vazhdojnë të ekzistojnë, nuk mund të mohohen ndryshimet dhe investimet e realizuara ndër vite.
Qytetari thekson se nuk është i lidhur me shtetin dhe nuk mbështet verbërisht asnjë forcë politike, ndërsa shprehet se mesazhi i tij është një përpjekje për të sjellë një këndvështrim ndryshe në debatin publik, duke pranuar se qëndrimi i tij mund të ngjallë reagime të ndryshme.
Postimi i plotë i kryeministrit Rama
Mirëmëngjes dhe me një nga mesazhet e shumta të këtyre ditëve të habitshme në të keq e në të mirë, të cilin dikush bujarisht e ka postuar e një tjetër miqësisht ma ka dërguar, ju uroj një ditë të mbarë
Ja profili i të panjohurit bujar që më çoi miku me statusin e postimit të videos
@mr.elprofe
Provova t’i vesh për pak çaste këpucët e kryeministrit.
Jo për t’i bërë lajka.
Jo për të bindur askënd.
Thjesht për të parë si do ta shihja unë botën në vendin e tij.
Jam rritur në një Shqipëri ku nuk bëje dot 200 metra pa t’u grisur këpucët.
Do të ishim naivë po të thoshim se nuk janë bërë edhe gjëra të mira.
Kjo nuk do të thotë se çdo gjë është perfekte.
As që nuk janë bërë gabime.
Por për sqarim:
Unë nuk ha bukë nga shteti shqiptar që prej vitit 1997.
Nuk jam as i shitur.
As i blerë.
Dhe nuk mbështes verbërisht askënd.
Kjo këngë është thjesht një përpjekje për të parë anën tjetër të historisë.
Një kundërrrymë ndaj asaj që dëgjojmë çdo ditë.
E di që do shahem.
Por s’ka problem.
Sepse në fund të fundit:
I shari shan.
I mençuri mendon.
