Kryeministri Edi Rama e nisi ditën e sotme duke bërë një reagim të ngjatë në rrjetet sociale, ku postoi foton e një protestuesi që qëndroi deri në mëngjes te shkallët përpara kryeministrisë.
Në letrën e gjatë, Rama e ftonte protestuesin që të shkonte tek ai, pasi tha se ia dinte hallet që janë të përbashkëta. (Lexoni letrën e kryeministrit këtu)
“Nëse përgjigja jote do të jetë akoma se armiku yt jam unë, patjetër që do ta respektoj. Sepse demokracia jeton edhe nga kjo e drejtë dhe nga respekti për këtë të drejtë. Por nëse një ditë do të kuptosh të vërtetën e thjeshtë, se halli yt nuk është asfare larg hallit tim, atëherë mos i prit aty ata që do të kthehen përsëri në mbrëmje.
Eja tek unë.”, shkruajti Rama në një pjesë të letrës.
Personi me flamur që Rama e përzgjodhi për t’i dërguar këtë letër, i është përgjigjur kryeministrit me një koment, ku ndër të tjera e pyet “Nëse e njeh kaq mirë hallin tim, çfarë të pengoi ta zgjidhje gjatë gjithë këtyre viteve?”
Komenti i plotë:
Zoti Kryeministër,
Nuk më zemëron fakti që nuk më kupton. Më zemëron fakti që më kupton shumë mirë.
Ti në këtë letër i përshkruan hallet e mia me saktësi: pagën e ulët, padrejtësitë, pronat, shëndetësinë, arrogancën e pushtetit.
Pikërisht sepse i njeh kaq mirë, unë pyes: pse pas kaq vitesh në krye të qeverisë vazhdojnë të jenë pjesë e jetës sime?
Nuk dua të jem hero protestash dhe as vegël e opozitës.
Nuk dua as të më thonë se jam përdorur nga të tjerët sa herë që protestoj.
Dua thjesht që shteti im të funksionojë.
Nëse protestoj, nuk do të thotë se më ka dërguar dikush.
Mund të thotë se kam mbetur pa rrugë tjetër për t’u dëgjuar.
Dhe nëse pas kaq vitesh pushtet ende më fton të vij tek ti për të zgjidhur hallin tim, atëherë ndoshta problemi nuk është se unë jam vetëm.
Ndoshta problemi është se shteti ende nuk ka ardhur tek unë.”
Nëse e njeh kaq mirë hallin tim, çfarë të pengoi ta zgjidhje gjatë gjithë këtyre viteve?
