Kryeministri Edi Rama ka deklaruar se Shqipëria është shumë pranë finalizimit të një linje direkte ajrore me Shtetet e Bashkuara të Amerikës, duke e cilësuar këtë si hapin e radhës pas inaugurimit të fluturimit të parë transoqeanik mes Tiranës dhe Torontos.
Gjatë ceremonisë së përurimit të linjës direkte Tiranë–Toronto, Rama tha se lidhja ajrore me Kanadanë është pjesë e një strategjie më të gjerë për forcimin e lidhjeve të Shqipërisë me tregjet e mëdha ndërkombëtare.
“Objektivi ynë strategjik është që së shpejti të kemi edhe linjën tjetër direkte, atë me Shtetet e Bashkuara. Edhe në raport me këtë objektiv është bërë përparim dhe mund të them se jemi shumë më afër finalizimit sesa ç’mund të mendonim vetëm pak vite më parë”, u shpreh kryeministri.
Rama vlerësoi gjithashtu zhvillimin e Aeroportit Ndërkombëtar të Tiranës, duke theksuar se ai renditet prej disa vitesh ndër aeroportet me rritjen më të shpejtë të numrit të pasagjerëve në Europë.
Sipas tij, në vitin 2016 aeroporti regjistronte rreth 22 mijë fluturime në vit dhe 2.2 milionë pasagjerë, ndërsa në vitin 2025 numri i pasagjerëve ka arritur në 13.7 milionë dhe fluturimet në 82 mijë.
“Të dhënat e aeroportit të Tiranës janë të jashtëzakonshme. Mjafton të krahasosh shifrat nga viti 2016 deri në vitin 2025 për të kuptuar rritjen marramendëse që ka ndodhur”, deklaroi Rama.
Kryeministri njoftoi edhe një fazë të re modernizimi të aeroportit, e fokusuar te transformimi digjital. Sipas tij, së shpejti do të vendosen porta digjitale që do të mundësojnë kalimin e pasagjerëve shqiptarë me pasaportë biometrike pa kontrollet tradicionale, falë përdorimit të teknologjisë së inteligjencës artificiale.
“Nëse je shqiptar dhe ke një pasaportë biometrike shqiptare, hyrja në aeroport do të jetë si në shtëpinë tënde. I gjithë informacioni do të merret përmes inteligjencës artificiale që do të ketë kjo portë. Fillimisht sistemi do të përdoret për pasagjerët vendas dhe më pas do të shtrihet edhe për të huajt”, tha ai.
Fluturimi inaugurues Tiranë–Toronto u realizua më 19 qershor dhe operimet do të vazhdojnë gjatë sezonit veror deri më 9 tetor 2026, me një frekuencë javore.
Me hapjen e kësaj linje, Shqipëria hyn për herë të parë në hartën e fluturimeve direkte transoqeanike, ndërsa qeveria synon që hapi i radhës të jetë vendosja e një lidhjeje direkte ajrore mes Tiranës dhe Shteteve të Bashkuara të Amerikës.
