Pavarësisht takimit dhe buzëqeshjeve në samitin e G7, Donald Trump ka rikthyer sulmet ndaj kryeministres italiane Giorgia Meloni. Në përfundim të samitit në Evian dhe pas mbledhjes së Këshillit Europian – i cili nuk përmbushi pritshmëritë e Uashingtonit, veçanërisht në çështjen e armatimeve – presidenti amerikan deklaroi: “Me shumë gjasa ajo është e lumtur që i fola”.
Trump u shfaq përçmues dhe ende i irrituar ndaj Melonit, duke shkuar deri aty sa të thoshte: “M’u lut të bëja një foto me të, më erdhi keq për të”. Kreu i Shtëpisë së Bardhë i bëri këto komente gjatë një interviste ekskluzive për emisionin “L’Aria che Tira” në televizionin italian La7.
Por Meloni i hodhi poshtë pretendimet e Trump, duke i cilësuar ato si të trilluara. “Jam e habitur. Nuk e kuptoj pse presidenti amerikan sillet në këtë mënyrë me aleatët e tij. Nuk është hera e parë që ndodh. Mund të them vetëm se më vjen keq që nuk tregon të njëjtën vendosmëri ndaj armiqve të Perëndimit dhe ndaj liderëve me të cilët tregohet shumë më i butë. Një gjë duhet ta mbajë mend: unë dhe Italia nuk përgjërohemi kurrë”, u shpreh ajo.
Ndërkohë, ministri i Jashtëm italian, Antonio Tajani, ka anuluar vizitën e planifikuar në Miami më 21 dhe 22 qershor, duke i cilësuar deklaratat e Trump si “të rënda” dhe “fyese” ndaj gjithë Italisë.
Takimi në Evian
Një ditë më parë, Giorgia Meloni kishte deklaruar se marrëdhënia e saj me Donald Trump mbetej “e pandryshuar” pas samitit të G7.
Duke folur për takimin e tyre në Evian, kryeministrja italiane u shpreh: “Mes nesh nuk pati as nevojë të bisedonim për të sqaruar gjëra. Nuk pati akuza apo ankesa. Unë dhe Donald kemi karakter të fortë, jemi dy persona që mbrojmë me vendosmëri interesat kombëtare të vendeve tona. Nuk kemi nevojë të sqarojmë çdo herë mosmarrëveshjet kur nuk biem dakord për diçka.”
Reagimet e politikës italiane
Deklaratat e Donald Trump ndaj Giorgia Melonit kanë shkaktuar reagime të forta në politikën italiane.
“Trump është një gënjeshtar serial dhe një ngacmues politik”, shkroi në rrjetin X Carlo Calenda. “Personalisht nuk besoj aspak se Giorgia Meloni i është lutur për ndonjë gjë. Në çdo rast, këto fyerje duhen refuzuar, pasi cenojnë nderin e kombit.”
Edhe senatori i Partisë Demokratike, Filippo Sensi, shprehu solidaritet me Melonin, duke i cilësuar komentet e Trump si “të papranueshme”.
Ndërkohë, ish-kryeministri dhe lideri i Movimento 5 Stelle, Giuseppe Conte, deklaroi se “Italia nuk meriton të poshtërohet në mënyrë kaq të hapur”. Sipas tij, është e papranueshme që një aleat të flasë në atë mënyrë për institucionet italiane. Conte kërkoi një reflektim të thellë pas kësaj ngjarjeje, duke shtuar se “garimi pas fotove dhe miratimi i çdo kërkese nuk mund të jetë mbi interesin kombëtar”.
Kritik ishte edhe Nicola Fratoianni, i cili tha se nuk di nëse duhet të shqetësohet më shumë për një Trump “pa asnjë frenë” apo për “mungesën totale të besueshmërisë ndërkombëtare të Melonit”. Sipas tij, situata është rezultat i zgjedhjeve politike të vetë kryeministres dhe afërsisë së saj me Trump.
Nga mazhoranca, nënsekretari i Presidencës së Këshillit të Ministrave, Giovanbattista Fazzolari, i quajti deklaratat e presidentit amerikan “delire ndaj Melonit” dhe pjesë të një serie sulmesh ndaj liderëve evropianë. Sipas tij, Trump po dëmton marrëdhëniet historike mes SHBA-së dhe Europës, duke dëmtuar jo vetëm Europën, por edhe vetë Shtetet e Bashkuara.
Edhe kreu i partisë Noi Moderati, Maurizio Lupi, i cilësoi fjalët e Trump “të pajustifikueshme dhe të papranueshme”. “Italia nuk lyp asgjë nga askush dhe kush e njeh Giorgia Melonin e di mirë se ajo nuk do t’i lutej kurrë askujt”, tha ai, duke akuzuar opozitën se po shfrytëzon politikisht çështjen.
Intervista mes Trump dhe gazetarit italian
Daniele Compatangelo: Mirëmbrëma, zoti President. Jam Daniele Compatangelo, korrespondent nga Shtëpia e Bardhë.
Donald Trump: Fol.
Daniele Compatangelo: Kam dy pyetje për Ukrainën dhe Hezbollahun, nëse më lejoni. Nëse Ukraina vazhdon të shfaqë interes për t’u anëtarësuar në Bashkimin Europian, a mund të komplikojë kjo përpjekjet tuaja për të arritur një marrëveshje me presidentin Putin? A duhet Ukraina të mbetet neutrale? Çfarë mund t’i japë fund këtij konflikti?
Donald Trump: Nuk jam i përfshirë në këtë çështje. Ne duam vetëm paqe. Si është kryeministrja juaj? Si është?
Daniele Compatangelo: Sapo jeni takuar me të në samitin e G7. Çfarë mendoni për të? Si e vlerësoni bisedën që patët ulur në atë divanin e vogël?
Donald Trump: Çfarë tha ajo kur më takoi?
Daniele Compatangelo: Besoj se ishte e lumtur t’ju takonte dhe të kishte një mik si ju.
Donald Trump: Me shumë gjasa është e lumtur që i fola! Nuk isha i detyruar t’i flisja!
Daniele Compatangelo: Na tregoni për atë takim.
Donald Trump: Nuk di çfarë t’ju them! M’u lut të bëja një foto me të! E donte aq shumë atë foto me mua. Mund edhe të mos e kisha bërë, por më erdhi keq për të!
Daniele Compatangelo: Çfarë i sugjeruat asaj dhe aleatëve europianë për Ukrainën? Ju pretendoni se keni zgjidhur tashmë tetë konflikte, çfarë këshille u dhatë?
Donald Trump: Europianët kanë gabuar në gjithçka për energjinë dhe kanë gabuar në gjithçka për emigracionin. Nëse nuk i zgjidhin këto probleme, Europa nuk do të jetë më kurrë e njëjtë. Ndoshta as nuk do të arrijnë t’i zgjidhin. Emigracioni është një katastrofë dhe energjia, me gjithë ato turbina ere që kanë dështuar, është po ashtu një katastrofë. Do të flisja më gjatë, por tani duhet të largohem. Faleminderit!
Daniele Compatangelo: Faleminderit, zoti President./CorrieredellaSera
